JCH-2022 saralash. Iroq Eron va Bahraynga qarshi o'yinlarni Iordaniyada o'tkazadi

"C" guruhidan joy olgan Iroq terma jamoasi o'z maydonida 14 noyabr kuni Eronni, undan keyin 19 noyabrda Bahraynni qabul qilishi lozim edi. Biroq mamlakatda yuzaga kelgan notinch vaziyat tufayli FIFA Iroq terma jamoasiga o'z maydonida o'yin o'tkazishga ruxsat bermadi. 

Natijada Iroq futbol federaciyasi boshqa variantlarni qidirishga majbur bo'ldi va navbatdagi ikkita uchrashuvni Iordaniyada o'tkazishga kelishib oldi. Bu haqda federaciya rahbari Abdelxoliq Masud shunday dedi: "Biz Iordaniyani tanladik, endi Eron va Bahraynga qarshi bahslarni shu davlatda o'tkazamiz. Hozircha FIFAning tasdig'ini kutyapmiz". 

Eslatib o'tamiz, Iroq 10 oktyabr kuni Gonkong bilan Basrada o'ynab 2:0 hisobida zafar quchgan, stadionga 32 mingdan ziyod muxlis tashrif buyurgandi. Guruh jadvalida Iroq 7 ochko bilan birinchi, Bahrayn ham 7 ochko bilan ikkinchi, Eron esa 6 ochko to'plagan holda uchinchi o'rinda boryapti.