Jeyk Pol Fyuri bilan jang oldidan doping testi topshirishdan bosh tortdi

Mashhur lo'lilar oilasining otasi Jon Fyuri Marca nashriga bergan intervyusida amerikalik bokschi - bloger Jeyk Pol (4:0, 3 KO) o'g'li Tommi Fyuriga (7:0) qarshi jangi oldidan doping-testdan o'tishdan bosh tortganini aytdi. 

Ushbu jang 18 dekabr kuni AQSHda o'tkazilishi rejalashtirilgan.

«SHartnomada juda ko'p narsa kiritilgan, bularni barchasini bajarishingiz lozim. Men davom etishim mumkin edi, lekin siyosat bilan odamlarni zeriktirmoqchi emasman. Faqat shuni aytamanki, ular VADA tekshiruvidan bosh tortdilar. Bu meni biroz bezovta qildi, chunki shartnomaga shu bandni kiritmoqchi edim. Ammo u tomon rad etdi».

Biroq, Fyuri jamoasi bundan hech qanday muammo tug'dirmaydi, aksincha, kurashdan voz kechmaydi.

«Menga bu baribir yoqmaydi. Biz shunchaki, bu jang bo'lishini xohlaymiz, chunki biz uni yutishimiz mumkinligini bilamiz. Odamlar Tommi mag'lubiyatga uchraydi deb o'ylashadi, ular hazil qilishsa kerak. Fyuri engilishdan ko'ra o'lishni afzal biladi», - dedi Jon Fyuri.