Kafolatlangan gonorari 32 mln dollar bo'lgan jang ishtirokchilari taroziga chiqishdi

Oqshom doirasida amerikalik bokschi-bloger Jeyk Pol britaniyalik professional bokschi Tommi Fyuriga qarshi ringga ko'tariladi. Har ikki bokschi tarozidan o'tish marosimida hozir bo'lishdi va har ikkalasi ham belgilangan vazn meyorini bajarishdi. 

Pol 83.3 kilogramm (183.6 funt), Fyuri esa 83.7 kilogramm (184.5 funt) tosh bosdi. Bokschilar 30 soniyalik ko'z urishtirish marosimida ham yuzma-yuz kelishdi. Kutilganidek, bu jarayon shunchaki sokin o'tmadi. Britaniyalik bokschining asablari dosh berolmadi va blogerni turtib yubordi.  

"Uning vaqti tugadi. U tamom bo'ladi. Jeyk Pol boshqa boks janglarida ringga chiqmaydi. Uni uzog'i bilan to'rt raundda yo'q qilaman", - dedi Fyuri.

"U katta akasi singari katta gapirishni yaxshi ko'radi. Lekin uning asabiylashayotgani va qaltirab turishiga hamma guvoh bo'ldi. Men xotirjamman. Menga bunday o'yinlar yarashmaydi – men Ogayo shtatining Klivlend shahridan kelgan haqiqiy vahshiyman. Asl qotil menman", – deya Fyurining gapiga javob qaytargan Pol. 

Avvalroq, jang 8 raund etib belgilangan, Jeyk Pol 25 million dollar, Tommi Fyuri esa 7 million dollar kafolatlangan gonorarga ega bo'lishi aytilgan edi.