Kamonchilarimiz uchun “Mustaqillik kubogi” bahslari boshlandi

Kecha ana shunday turnirlardan biri kamondan otish sporti bo'yicha boshlandi. Musobaqa davlatimiz madhiyalari sadosi ostida tantanali ochilish marosimi bilan start oldi. Tadbirda MOQ prezidenti Rustam SHoabdurahmonov, O'zbekiston kamondan otish federaciyasi rahbariyati, sportchi va murabbiylar ishtirok etishdi. 

O'zbekiston kamondan otish federaciyasi raisi Otabek Imamov ochilish marosimida musobaqani ochiq deb elon qilgach, sportchilar chigalyozdi mashqlarini boshlab yuborishdi. Musobaqa davomida MOQ rahbari ham o'z fikrlarini bildirib o'tdi.

“Avvalambor, mana shunday yuqori saviyadagi musobaqani tashkil qilishda jonbozlik ko'rsatgan federaciya mutasaddilari, sportchi va murabbiylarga minnatdorchilik bildiramiz. Biz onlayn tizimga moslashib bo'ldik va shu tartibda ishlashda davom etamiz. Vaziyat shuni taqozo qilar ekan, onlayn musobaqalarda kuch sinashamiz. Jismoniy tarbiya va sport vazirligi bilan kelgusida o'quv-mashg'ulot yig'inlarini tashkil qilish borasidagi takliflaringizni kutib qolamiz. Birlashib, barcha maqsadlarni, albatta, amalga oshira olamiz”, – dedi Rustam SHoabdurahmonov.

Takidlash joiz, musobaqa 2 kunga mo'ljallangan bo'lib, bugun saralash bahslari, ertaga esa final bellashuvlari o'tkaziladi. Saralash bosqichida Toshkent shahri, Samarqand va Farg'ona viloyatlaridan 20 nafardan ziyod sportchi g'oliblik uchun kurashga kirishdi.