Karatechilarimizning yil sarhisobi

Mamlakatimizda sportga qaratilayotgan ulkan etibor samarasida nafaqat Olimpiya o'yinlaridan joy olgan sport turlari, balki sharq yakka kurashlariga mansub turlar ham rivojlanmoqda.

Ayniqsa, karate WKF bilan shug'ullanayotgan sportchilar soni kabi ushbu sport turi bo'yicha qo'lga kiritilayotgan yutuqlarimiz ham yil sayin ortib borayotir. Jumladan, 2024 yilgi sport mavsumi ham karate WKF sportchilari uchun muvaffaqiyatli bo'ldi.  

Karatechilarimiz yil davomida 10 ga yaqin xalqaro musobaqalarda ishtirok etdi va 12 ta oltin, 10 ta kumush hamda 34 ta bronza jami 56 ta medalga savzovor bo'ldi. Bu ko'rsatgich 2023 yilga nisbatan 42 taga ko'p. Har bir sport turi ommalashishida albatta milliy musobaqalarning o'rni beqiyos. Joriy yil karate WKF bo'yicha 4 bor turli yo'nalishlarda O'zbekiston chempionati o'tkazilib, 2 ming 500 nafar sportchi qamrab olindi.  

O'tgan yil esa ushbu raqamlar 1500 nafarni tashkil etgan edi. Mazkur mamlakat birinchiliklari yuqori saviyada o'tishi uchun xorijlik hakamlar brigadasi taklif etildi. Har bir musobaqada shaffoflikni taminlash maqsadida raqamlashtirish tizimiga o'tildi.

SHuningdek, O'zbekiston karate (WKF) associaciyasi tomonidan yil mobaynida milliy terma jamoa uchun 14 bor o'quv-mashg'ulot yig'ini tashkil etilib, ularga 500 nafar sportchi jalb qilindi.  

Yana bir etiborli jihati shundaki, har bir yosh toifasidagi terma jamoalarga alohida murabbiylar shtabi shakllantirildi. Hududlarda parakarateni rivojlantirish borasida ham qator chora-tadbirlar amalga oshirildi. Natijada dekabr oyida ilk bor parakarate bo'yicha O'zbekiston chempionati o'tkazildi.

Umid qilamizki, kelayotgan 2025 yilgi sport mavsumida bosh murabbiy Sulaymon Yusupov qo'l ostida Sevinch Rahimova, Gulshan Alimardonova, Quvonch Muhammadiev, Abdulvahob Rashidov kabi iqtidorli karatechilarimiz yuksak marralarni zabt etadi.