Karlush Keyrush: “Bugun biz g'alabaga loyiq o'yin ko'rsatdik”

“Ikkala jamoa uchun juda qiyin kechdi. Bugun biz g'alabaga loyiq o'yin ko'rsatdik. O'zbekiston asosan o'z yarim maydonida to'pni egallab turdi va to'pni hujum chizig'iga uzatib berishga urindi. Gol urdik g'alabaga erishdik”, - deydi Keyrush.

- Azmun, Jahonbaxsh va Dejaga kabi futbolchilar nima uchun asosiy tarkibda maydonga tushishmadi?

- Ular ilk daqiqadan o'ynashga tayyor edilar. SHunchaki taktik qaror edi. Azmun ham, Jahonbaxsh ham zaxiradan o'yinga tushib yaxshi harakat qilishdi.

- Eron himoyada ham, hujumda ham yaxshi o'ynadi. O'zbekiston esa aksincha, darvoza tomon bironta aniq zarba bera olmadi. Raqibdan bunchalik kuchsiz o'yin kutganmidingiz?

- O'zbekistonning bunday o'ynashida Eronning xissasi katta bo'ldi. Men Suriya va Qatar bilan o'yinlarni ko'rib, O'zbekistonni o'rganib chiqqan edim. Bugun raqibga zarba berishga imkon bermadik va g'alabaga erishdik. Eron terma jamoasi futbolchilarini tabriklayman. SHu jumladan, O'zbekiston terma jamoasiga ham rahmat aytaman. Ular ham muxlislarga g'alaba taqdim etishga urinishdi.

- Janob Keyrush, siz O'zbekistonga uch marta Eron bosh murabbiyi sifatida raqib bo'lgansiz. Qaysi o'yin siz uchun og'ir o'tgan?

- Eng qiyini Tehronda o'tgan bahs bo'lgan. O'sha o'yinda biz yutqazib qo'ygan edik. Bugungi g'alaba yoqimli, lekin saralash bahslaridagi olishimiz kerak bo'lgan 30 ochkoning atiga 3tasini oldik xolos. Hali oldinda o'yinlar ko'p. O'zbekiston hisobida ham 6 ochko bor. Janubiy Koreya va Xitoy terma jamoalari Toshkentda bitta xato qilishsa, O'zbekiston ularni jazolaydi. Bunga ishonaman.

Narzulla Saydullaev yozib oldi