“Katta Dubulg'a” turniridan bitta bronza medali bilan qaytishdi

Dunyoning 41ta davlati polvonlari ishtirok etgan musobaqada O'zbekiston terma jamoasi azolari ham o'z imkoniyatlarini sinovdan o'tkazishdi. Murabbiylarimiz Judo Grand-Slam Tokyo 2016 turniriga ikkinchi raqamli va asosan yosh dzyudochilarni olib borishgandi.

Natija ham shunga yarasha bo'ldi. To'qqiz nafar dzyudochimizdan faqat biri sovrindorlar safidan joy oldi. 73 kg vazn toifasida tatamiga chiqqan G'iyosjon Boboev bronza medalini qo'lga kiritdi.

U ikkinchi davradan bahslarga kirishdi va bu bosqichda mo'g'ulistonlik Batgerel Battsetsegni mag'lub etdi. Yarim final yo'llanmasi uchun kechgan uchrashuvda esa bo'lajak chempion yaponiyalik Soichi Xoshimotoga yutqazib qo'ydi.

O'tish bahslarida kurashni davom ettirgan Boboev rossiyalik Denis Yarcev va belgiyalik Dirk Van Ticheltni engib, bronza medaliga sazovor bo'ldi.

Qizlar o'rtasidagi musobaqada qatnashgan Diyora Keldiyorova (52 kg) beshinchi o'rinni egalladi. Gulnoza Matniyozova (70 kg) esa ettinchi o'rin bilan kifoyalandi. 60 kg vazndagi Muhriddin Tilovov ham ettinchi bo'ldi. Qolgan barcha dzyudochilarimiz saralash bahslaridayoq mag'lubiyatga uchrashdi.

Umumjamoa hisobida 10ta oltin, 9ta kumush, 16ta bronza medalini qo'lga kiritgan dzyudo vatani Yaponiya terma jamoasi birinchi o'rinni egalladi. Kuchli uchlikdan bittadan oltin medalga ega Rossiya va Mo'g'uliston terma jamoalari yakun yasashdi. Terma jamoamiz 9-pog'onadan joy oldi.