Kurash–World Series Pro Dunyo mo'jizali yurtida davom etadi

Bu tog'larning qorasi juda uzoqdan, bir necha o'n kilometr uzoqlikdagi Qohira shahridan ham ko'rinib turadi. G'aroyib ko'rinish, geometrik aniqlik, tarixiy jozibadorlik, qudratli ulug'vorlik bularning barchasi Misr ehromlarida mujassam. 

Misr ehromlari Dunyo mo'jizalari ro'yxatiga ham kiritilgan.

7-13 iyul kunlar Mo'jizalar yurtida ilk bora katta kurash bayrami tashkil etiladi. Kurash bo'yicha kattalar va yoshlar o'rtasida Afrika chempionati hamda Kurash–World Series Pro turnirining Afrika qitasi saralash bosqichlariga Misr poytaxti Qohira shahri mezbonlik qiladi.

Xalqaro Kurash associaciyasi, Afrika Kurash ittifoqi, Misr Kurash qo'mitasi, Misr Milliy Olimpiya qo'mitasi va O'zbekiston hukumati hamkorligida tashkil etilayotgan mazkur musobaqalarda qitaning eng kuchli polvonlari kuch sinashadi.

Kurash bahslari Qoxiraning eng yirik va zamonaviy “Complex Heliopolis” yopiq sport majmuasida tashkil etilishi rejalashtirilgan. Mazkur kompleks 1991 yilda qurib foydalanishga topshirilgan bo'lib, 4 ta yopiq majmuadan tashkil topgan. 16 ming tomoshabinni o'z bag'riga sig'dira oladigan kompleksning futbol zalida FIFA doirasida ko'plab xalqaro uchrashuvlar o'tkazilgan.

Musobaqa dasturiga asosan 7 iyul kuni Afrika Kurash ittifoqining Boshqaruv yig'ilishi o'tkaziladi. 8 iyul kuni hakamlar va murabbiylar seminari va imtihonlari boshlanadi. 9-11 iyul kunlari kattalar va yoshlar o'rtasi Afrika chempionati bo'lib o'tadi.

12 iyul kuni esa O'zbekiston Respublikasi Prezidenti sovrini uchun World Series Pro turnirining Afrika qitasi saralash bosqichi o'z g'oliblarini aniqlaydi.

Malumot uchun, Misr Kurash qo'mitasi 2022 yilda tashkil etilgan va shu yilning o'zida Puna shahrida bo'lib o'tgan IKAning navbatdagi Kongressida azolikka qabul qilingan. Kurash bo'yicha yirik xalqaro tadbirlarda Misrda ilk marotaba tashkil etilmoqda.