Leon Edvards Kolbi Kovingtonga qarshi jang qilishdan bosh tortdi

Jang yakunlanganidan so'ng UFC prezidenti Dana Uayt Leonning keyingi raqibi Kolbi Kovington bo'lishini malum qilgandi. Divizion reytingida ikkinchi o'rinni egallab turgan Kolbi kechagi chempionlik jangida zaxira jangchisi edi. 

"Ochig'i, bunda qanday mano bor, tushunmayapman. Kovington deyarli bir yarim yildan beri jang o'tkazmayapti. U shunchaki ishsiz o'tirgandi. Qanday qilib chempionlik jangi uchun imkoniyatga ega bo'ldi, shunga aqlim etmayapti. Divizionda jang o'tkazib, chempionlik uchun munosib mehnat qilgan yigitlar etarlicha topiladi. Endi men qirolman! O'ylashimcha, keyingi raqibim kim bo'lishini o'zim aniqlashim kerak va bunga to'liq haqliman", - dedi britaniyalik UFC 286 turniridan keyingi matbuot anjumanida. 

Edvardsning so'zlariga qaraganda, uning keyingi raqibi Xorxe Masvidal bo'lishi lozim. Buning uchun Xorxe 8 aprel kuni Mayamida o'tkaziladigan UFC 287 turnirida braziliyalik Gilbert Bernsni mag'lub etishi shart.

"Agar Masvidal Bernsni mag'lub eta olsa, u mening ayni paytdagi eng ideal raqibimga aylanardi. Bu jang pullik translyaciya nuqtai nazaridan ham katta daromad keltirardi. Qolaversa, o'rtamizda adovat bor. Bu o'ziga yarasha kichik tarixga ham ega. Orani ochiq qilib, bunga nuqta qo'yishimiz kerak. 

Yana Kolbi haqida. Men chempionlik kamari yo'lida 12 ta jang o'tkazdim. Kovington esa jarohati bo'lmasa ham, shunday imkoniyatga yaqin keldi. Kolbi o'shanda menga bu o'zim kim deb kinoya qilgandi", - deya so'ziga yakun yasadi chempion.