London Chess Classic 2025. Nodirbek Abdusattorovda chiroyli g'alaba va u endi yakka peshqadam!

Mukofot jamg'armasi 50 000 funt sterlingni tashkil etuvchi ushbu nufuzli musobaqada dunyoning ko'zga ko'ringan 10 nafar shaxmatchisi qatori yosh grossmeysterimiz Nodirbek Abdusattorov ham ishtirok etyapti. Birinchi davrada britaniyalik grossmeyster Gavain Jons bilan durang o'ynagan hamyurtimiz ketma-ket ikki g'alabaga erishdi. Ikkinchi turda Abdusattorov oq donalarda hindistonlik Mishra Abhimanyuni mag'lubiyatga uchratgandi. 

Kecha tunda o'tkazilgan uchinchi turda Nodirbek qora donalarda o'ynaganiga qaramay, Angliya sharafini himoya qilayotgan rossiyalik grossmeyster Nikita Vityugovni chiroyli tarzda taslim etdi. Vityugov dastlabki ikki turda durang o'ynagandi. 

Uchinchi turda shaxmatchimizning asosiy raqiblari ochko yo'qotishdi. Greciyalik Nikolas Teodoru Mishra Abhimanyu bilan, turnirning birinchi raqamli ishtirokchisi franciyalik Alireza Firuzdja esa angliyalik Maykl Adams bilan durang o'ynadi. Uchinchi turda birgina Abdusattorov g'alabaga erishdi. Bu esa uning turnir jadvalida 2,5 ochko bilan yakka peshqadam bo'lib olishini taminladi. Teodoru va Firuzdja hisobida 2 ochkodan bor. 

Bugun London Chess Classic 2025 turnirida 4-tur partiyalari o'ynaladi. Nodirbek Abdusattorov qora donalarda angliyalik grossmeyster Maykl Adamsga qarshi bahs olib boradi. Adams uchta durang evaziga 1,5 ochko bilan turnir jadvalida 4-o'rinni band etgan.