London Chess Classic 2025. Nodirbek Abdusattorovda ketma-ket to'rtinchi g'alaba!

Mukofot jamg'armasi 50 000 funt sterlingni tashkil etuvchi ushbu nufuzli musobaqada dunyoning ko'zga ko'ringan 10 nafar shaxmatchisi qatori yosh grossmeysterimiz Nodirbek Abdusattorov ham bosh sovrin uchun kurash olib boryapti. Birinchi turda britaniyalik grossmeyster Gavain Jons bilan durang o'ynagan hamyurtimiz ketma-ket to'rtta g'alabaga erishdi. 

Abdusattorov ikkinchi turda oq donalarda hindistonlik Mishra Abhimanyuni, uchinchi turda qora donalarda Angliya sharafini himoya qilayotgan rossiyalik grossmeyster Nikita Vityugovni, to'rtinchi turda 54 yoshli Buyuk Britaniyalik chempioni Maykl Adamsni mag'lubiyatga uchratgandi. 

Kecha London Chess Classic 2025 turnirining beshinchi turida Nodirbek oq donalarda o'ynadi. Bu safar u 5-tur oldidan turnir jadvalida 3-o'rinda borgan greciyalik Nikolas Teodorouga qarshi bahs olib bordi va raqibini chiroyli tarzda taslim etdi. Bu turda birgina hamyurtimiz g'alabaga erishdi. Qolgan to'rtta partiyada kuchlar teng keldi.   

Ketma-ket to'rtta g'alabadan keyin Abdusattorov turnir jadvalida 4,5 ochko bilan yakka peshqadamlikni mustahkamladi. Turnirda birinchi raqam ostida tasniflangan franciyalik Alireza Firuzdja bu turda angliyalik Gavayin Jons bilan durang o'ynadi. Firuzdja 3,5 ochko bilan ikkinchi o'rinni egallab turibdi. Nikita Vityugov, Lyuk Maksheyn va Nikolas Teodorou hisobida 2,5 ochkodan bor. Bugun Abdusattorov 6-turda amerikalik taniqli grossmeyster Sem SHenklendga qarshi qora donalarda o'ynaydi.