London Chess Classic 2025. Nodirbek Abdusattorovda ketma-ket uchinchi g'alaba!

Mukofot jamg'armasi 50 000 funt sterlingni tashkil etuvchi ushbu nufuzli musobaqada dunyoning ko'zga ko'ringan 10 nafar shaxmatchisi qatori yosh grossmeysterimiz Nodirbek Abdusattorov ham bosh sovrin uchun kurash olib boryapti. Birinchi davrada britaniyalik grossmeyster Gavain Jons bilan durang o'ynagan hamyurtimiz ketma-ket uchta g'alabaga erishdi. 

Abdusattorov ikkinchi turda oq donalarda hindistonlik Mishra Abhimanyuni, uchinchi turda qora donalarda Angliya sharafini himoya qilayotgan rossiyalik grossmeyster Nikita Vityugovni chiroyli tarzda taslim etgandi. 

Kecha London Chess Classic 2025 turnirining to'rtinchi turida Nodirbek yana qora donalarda o'ynadi. Bu safar u Buyuk Britaniya chempioni, 54 yoshli tajribali grossmeyster Maykl Adamsni mag'lubiyatga uchratdi. Adams bungacha uchta turda durang natija qayd etib, turnir jadvalida 1,5 ochko bilan 4-o'rinni band etib turgan edi. 

Turnirda birinchi raqam ostida tasniflangan franciyalik Alireza Firuzdja bu turda g'alaba qozonishga muvaffaq bo'ldi. U oq donalalarda ukrainalik grossmeyster Pavel Elyanovdan ustun keldi. Greciyalik Nikolas Teodoru esa Nikita Vityugov bilan murosaga keldi. Bugun Abdusattorov 5-turda aynan Teodoruga qarshi oq donalarda o'ynaydi. 

Bugungi beshinchi tur oldidan Nodirbek Abdusattorov 3,5 ochko bilan yakka peshqadam bo'lib turibdi. Firuzdja 3 ochko bilan ikkinchi o'rinni band etgan bo'lsa, Teodoru 2,5 ochko bilan kuchli uchlikka yakun yasagan.