Lyubinko Drulovich: “Bugun 3 ochko olishga majbur edik”

“O'yinda gol urishimiz oson bo'lmadi. Uchrashuvning birinchi qismini ancha yaxshi o'tkazdik. Bunda ko'plab golga tortadigan vaziyatlar yaratdik va taym oxirida gol urdik. Birinchi bo'limda Oybek Bozorovning harakati menga ko'proq yoqdi”, – deya o'z taassurotlarini haqida o'rtoqlashdi Lyubinko Drulovich.

– Bugungi o'yin uchun rahmat. Nimaning hisobiga bugun chiroyli o'yin ko'rsata oldik? Eronga qarshi o'yindan so'ng futbolchilarni qanday tayyorladingiz?
– Futbol emociyalar o'yini. Eron bilan uchrashuvda 1 ochko qo'lga kirita olgandik xolos. SHu bois ham bugun 3 ochko olishga majbur edik. Futbolchilarning harakatidan qoniqdim. Endi Janubiy Koreya jamoasiga qarshi o'yin kutib turibdi. Ular ancha tezkor ekanligini bilamiz. Bugungdan etiborimizni ana shu bahsga qaratamiz.

– Musobaqa davomida kiritayotgan gollaringizning aksariyati penaltidan bo'lmoqda. Tayyorgarlik davomida shu jihatlarda ko'proq ishlanganmidi?
– To'g'ri, bu endigina ikkinchi o'yinimiz. Qolgan bahslarda o'yinning o'zidan ham gol urishga harakat qilamiz. Bugun ham penaltidan bir marta gol urdik, qolaversa, raqib darvozabonining mahorati evaziga bir marotaba foydalana olmadik ham. Keyin o'yin davomida to'p nazoratini ko'proq ushlab turdik va bu bizga foyda berdi.

– Tarkibdagi o'zgarishlar tahlili. To'xtasinov va Bozorovning o'zgartirilishi oldindan rejalashtirilganmidi?
– Nurilloh birinchi o'yinda asosiy tarkibda harakat qilgan edi. Lekin bugungi bahsga Bozorovni tanladim Boisi unda jismoniy kuch ko'proq edi. Qolaversa, himoyadan hujumga o'tishda u ko'proq foyda berdi. Yakunda rejalarimiz o'zini oqladi.