Magnus Karlsen 14 yoshli Nodirbekni etirof etdi!

Xabar berganimizdek, Abdusattorov Biledagi ishtirokini bir vaqtning o'zida 16 yoshgacha bo'lgan 16 nafar shaxmatchiga seans berish bilan boshlagan edi. Nodirbek 16 partiyaning 15tasida g'alaba qozongan va faqat bittasida durang natija qayd etgandi. O'n to'rt yoshli hamyurtimizning bu master-klassi, yani mahorat sabog'i jahon chempioni Magnus Karslenning etirofiga sazovor bo'ldi. Karlsen mahalliy televideniyaga bergan intervyusida 13 yoshida dunyoning eng yosh ikkinchi grossmeysteriga aylangan Nodirbekni alohida tilga olgan. 

Ana shunday “aqliy hujum”dan so'ng hamyurtimiz nufuzli Swiss Rapid Chess Championship musobaqasida muvaffaqiyatli tarzda ishtirok etdi. SHveycarcha tizimda 9 turdan iborat baxslarda Abdusattorov 7 ochko bilan qo'shimcha ko'rsatkichlarga ko'ra to'rtinchi o'rinni egalladi. Eng yaxshi natijaga 8 ochko to'plagan rossiyalik Mixail Antipov (Rossiya, 2621) erishdi. Musobaqada 2-3 o'rinlarni 7,5tadan ochko jamg'argan grossmeysterlar - Aravindx CHitambaram (Hindiston, 2597) va Aleksandr Donchenko (Germaniya, 2577) band etishdi. 

Nodirbek tezkor shaxmat musobaqasidan so'ng standart shaxmat bahslarida ham ishtirok etdi. Bileda o'tayotgan xalqaro festivalning Master Tournament musobaqasida 31 davlatdan kelgan 117 shaxmatchi o'z mahoratini namoyish etyapti. Ular orasida jahon chempioni Magnus Karlsen boshchiligidagi 6 nafar super grossmeysterlar ham bor. Nodirbek  Abdusattorov (2534 standart bo'yicha reytingi) turnirda 23-raqam ostida tasniflangan bo'lib, ilk turda shveycariyalik shaxmatchini mag'lub etdi.