Mahmud Muradovning so'nggi raqibi bo'lmay qolgan Mishel Pereyra "Sfera"da jang qiladi

O'rta vazn toifasi vakili Mishel Pereyra Entoni Ernandesga qarshi oktagonga chiqadi. Ushbu jang 14 sentyabr kuni AQSHning Nevada shtati Las-Vegas shahridagi mahobatli "Sfera" arenada bo'lib o'tadi.  

Braziliyalik 31 yoshli Mishel Pereyra 8 ta g'alabali seriya bilan kelmoqda. U shu yilning may oyida Rio-de-Janeyroda o'tgan UFC 301 turniri doirasidang jangining 54-soniyasidayoq ukrainalik Igor Poteryani mag'lubiyatga uchratgandi. Aslida o'sha jangda Poteryaning o'rnida Mahmud Muradov bo'lishi kerak edi. Lekin Muradov bo'ynidagi yarasi sabab jangdan boy tortgan va keyinchalik UFC`dan chetlatilgandi. 

Amerikalik 30 yoshli Entoni Ernandes esa shu yilning fevralida ketma-ket beshinichi g'alabasini tantana qilgan edi. U Anaxaymda o'tgan UFC 298 turnirida rossiyalik Roman Kopilovni ikkinchi raundda nokautga uchratgandi. Ayni paytda Mishel Pereyra UFC o'rta vaznlilar reytingida 13, Entoni Ernandes esa 14-o'rinni egallab turibdi.