Maykl Peyj: "UFC`dagi so'nggi jangimda tarixiy lahzani taqdim etmoqchiman"

"O'zimga bosim o'tkazmaslikka harakat qilyapman, chunki faoliyatimdan mamnunman. Ko'proq narsaga erishishni istayman, lekin allaqachon erishgan yutuqlarimdan, qaerdan kelganimdan, qanchalik muvaffaqiyatli chiqish qilganimdan va o'z nomimni qanday yaratganimdan xursandman.

Men haqiqiy jang sanati ustasi ekanligimni ko'rsatdim, chunki o'zimni hamma sohada sinab ko'rdim. Qo'qopsiz jang qilish, jiu-jitsu, MMA, kikboksingda qatnashdim va agar UFC`da qolmasam ham, ehtimol, yangi narsalarni sinab ko'rishda davom etaman. Lekin bu erda hali yakunlanmagan ishlarim borligini his qilyapman, shuning uchun qolishni istayman. Biroq, bu faqat menga bog'liq emas", – dedi britaniyalik jangchi MMA Junkie nashriga bergan intervyusida.

UFC`da to'rtta g'alaba va bitta mag'lubiyat qayd etgan Peyj barcha janglarini hakamlar qarori bilan yakunlagan. Bo'lajak jangda esa britaniyalik sportchi aniq maqsad bilan chiqadi – dunyoning eng kuchli ligasi bayrog'i ostida ilk muddatidan avvalgi g'alabaga erishish.

"Avvalgi MVP`ni ko'rsatmoqchiman. Men UFC`ga Bellator`da ko'p marta taqdim etganim kabi lahzani hadya qilmoqchiman. Hatto bu mening so'nggi jangim bo'lsa ham, UFC`ga hamma eslab qoladigan tarixiy lahzani taqdim etishni istayman. Odamlar shunchaki tomosha qilish uchun qayta-qayta ko'radigan, juda tomoshabop bo'lgan epizod yaratmoqchiman. Odamlar: "Men o'sha turnirda bo'lganman", deb ayta olishlari yoki bu jangni ko'rayotganlarida qaerda bo'lganlarini aniq eslab qolishlari uchun. Men butun dunyodagi MMA muxlislariga shunday jangni taqdim etmoqchiman", – deb vada berdi Peyj.

Britaniyalik va o'zbekistonlik aralash yakkakurash ustalari o'rtasidagi o'rta vazn toifasidagi jang 5 sentyabr kuni Parij shahri mezbonlik qiladigan UFC Fight Night 287 turniri doirasida bo'lib o'tadi.