MDH o'yinlari. Mamlakatimiz sport delegaciyasi Qozonga etib bordi

Musobaqa sportning 17 ta turi bo'yicha tashkil etiladi. Unda mintaqaning 10 ta davlatidan 1 500 nafarga yaqin sportchi, 400 nafarga yaqin hakamlar va 100 nafarga yaqin boshqa sport sohasi mutaxassislari qatnashadi. Tabir joiz bo'lsa aytish kerak, «kichik olimpiada» bahslarida MDH mamlakatlari sportchilari 182 ta medallar jamlanmasi uchun bahslashadi.

Kecha O'zbekiston sport delegaciyasi azolari Rossiyaga jo'nab ketishdi. Delegaciya tarkibidan Turizm va sport vazirligi va Milliy Olimpiya qo'mitasi masul xodimlari, sportning boks, erkin va yunon-rusm kurashi bo'yicha terma jamoa azolari, umumiy hisobda 70 nafardan ortiq kishi o'rin olgandi.

Mamlakatimiz sport delegaciyasini kuzatish marosimida Turizm va sport vaziri o'rinbosari Avazjon Karimov ham ishtirok etdi va sportchilarimizga omad tiladi.

Kecha tunda Qozonga etib borgan vakillarimiz mazkur sport o'yinlari uchun barpo etilgan Olimpiya shaharchasiga joylashishdi.

Mamlakatimiz sport delegaciyasining ikkinchi qismi 3 sentyabr kuni, yakuniy qismi esa 6-7-sentyabr kunlari Rossiyaga jo'nab ketadi.