Medvedev Endi Marreyni mag'lub etib, Doha turniri g'olibiga aylandi

Hal qiluvchi finalda jahonning 8-raketkasi, rossiyalik Daniil Medvedev va ayni paytda ATR reytingida 70-pog'onani egallab turgan britaniyalik Endi Marrey to'qnash keldi. Uchrashuv "Xalifa xalqaro tennis majmuasi"ning markaziy kortida bo'lib o'tdi.

Bir soatu 47 daqiqa davom etgan uchrashuvda Medvedev Marreyni 6:4, 6:4 hisobida mag'lub etib, turnir bosh sovriniga ega chiqdi. Uchrashuv davomida Daniil 6 ta eys, 6 ta qo'shxato va 4 ta breyk qayd etdi. 

Endi esa 1 ta eys zarbasini amalga oshirib, to'pni o'yinga kiritishda 1 bor xatoga yo'l qo'ydi hamda 4 ta breykning 2 tasidan unumli foydalandi. SHu tariqa, rossiyalik tennischining Marrey ustidan qozongan g'alabalari soni 3 taga etdi (3:0). Marrey esa hali biror marta Medvedevni mag'lub etolmagan. 

Daniil Medvedev ushbu g'alaba orqali 250 reyting ochkosidan tashqari 209 ming dollarga ham ega bo'ldi. Marrey esa o'z navbatida 150 ochko va 122 ming dollar mukofot puli ishlab oldi.