Merganlar musobaqasi davom etmoqda

Yoshlar o'rtasida sportning ommaviyligini oshirish, jumladan, o'q otish sporti turlari bo'yicha yuqori malakaga ega bo'lgan, mamlakat terma jamoasiga munosib nomzodlarni saralash vazifasini o'tovchi musobaqada ishtirokchilar ikki yosh toifasida merganlik salohiyatlarini namoyish etishdi. Pnevmatik miltiq, pnevmatik tupponcha hamda mikst (aralash juftlik) yo'nalishidagi  musobaqalar 16 yoshgacha bo'lgan yigit qizlar hamda undan kattalar o'rtasida alohida tashkil etildi. 

- Bu orqali, xalqaro musobaqalarda ishtirok etuvchi yoshlar va kattalar terma jamoamizga munosib nomzodlarni saralab olamiz,- deydi O'zbekiston o'q otish sporti federaciyasi bosh kotibi Jaloliddin Atabullaev. 

Musobaqa natijalariga qarab shuni tushunishimiz mumkinki, respublikamiz viloyatlarida o'q otish sport turi yanada jadal rivojlanayotgani, ayniqsa, Andijon,  Namangan, Samarqand, Qashqadaryo, Xorazm, Farg'ona viloyatlarida voyaga etayotgan iqtidorli yoshlar sport turi infratuzilmasi ancha rivojlangan poytaxt vakillari bilan munosib raqobat qilishmoqda. Mutaxassislar O'zbekiston o'q otish sporti federaciyasi ochiq kubogi davomida Toshkent viloyati sportchilari Oybek Asilov, Suxrob Mirzajonov, Zaynab va Madinabonu Pardaboevalarning mahorat bobida o'zlaridan ancha katta yoshli sportchilardan o'zib ketayotganini takidlashdi. 

Garchi, O'zbekiston o'q otish sporti federaciyasi ochiq kubogi yakunlangan bo'lsada, ishtirokchilar navbatdagi musobaqa - Respublika texnik va amaliy sport turlari markazi tomonidan tashkil etilayotgan O'zbekiston kubogi g'oliblik uchun kurashni davom ettirishmoqda.