Merganlarimiz O'zbekiston kubogida kuch sinashishmoqda

Musobaqaning tantanali ochilish marosimida O'zbekiston Respublikasi Mudofaa vazirining o'rinbosari Alisher Norboev, MOQ prezidenti maslahatchisi Nazirjon Xudoyqulov, O'zbekiston o'q otish federaciyasi homiysi «Coca-Cola Ichimligi Uzbekiston Ltd» MCHJ bosh direktorining o'rinbosari Zafar Sobirov, federaciya raisining o'rinbosari Ramiz Enaliev ishtirok etishdi va sportchilarga o'zlarining iliq tilaklarini bildirib o'tdilar.

Musobaqa Mudofaa vazirligiga qarashli sport markazida 2-8 noyabr kunlari bo'lib o'tadi. Epidemiologik vaziyatni inobatga olgan holda bellashuvlar vaqtida rasmiylardan boshqa hech kim obektga kiritilmaydi va barcha sanitar-gigienik talablarga rioya qilinadi.

Ushbu O'zbekiston kubogida Toshkent shahri va viloyati, Andijon, Namangan, Surxondaryo, Samarqand, Xorazm viloyatlari sportchilari ishtirok etmoqda. Keyingi 5 kun ichida 100 dan ziyod sportchi Respublikamizning eng yaxshi merganlari g'oliblik uchun kurash olib boradi. Sportchilar pnevmatik va kichik kalibrli to'pponcha hamda miltiqdan o'q otish bo'yicha musobaqalashmoqdalar. Bahslar 10, 25 va 50 metr masofalarda bo'lib o'tmoqda.