Milliy terma jamoamiz shifokori Ektor Kuperni "aybladi"

CHor atrof qorga burkangan bugungi ajib saharda nonushta qilaturib, televizorda rusiyzabon “Xayrli tong” teledasturini tomosha qilayotgandim. Ko'rsatuvning ispanlar hayotiga bag'ishlangan parchasi diqqatimni tortdi. Emishki, “Ispanlar bemalolxo'ja xalq bo'lgani uchun ham kechki ovqatni shoshmasdan juda kech tanovul qilib, anchagacha uxlashmas, so'ngra ertalab kech uyg'onib, ishga bir-ikki soat kechikib ham boraverishar ekan. Bu ularda normal holat ekan”.

Beixtiyor terma jamoamizga ustozlik qilgan Ektor Kuper yodimga tushdi. Ajdodlari ispanlar bo'lgan Argentinada tug'ilib, anchadan buyon Ispaniyada yashayotgan “mister”ni (jamoada Kuperni barcha shunday chaqirardi) eslaganimning boisi bor. Murabbiylik faoliyati tahlilini mutaxassislarga qoldirib, uning o'z ishini professionali ekanligini etirof etgan holda, shifokor sifatida menga “mister”ning bir jihati hech yoqmasdi. To'g'rirog'i, u tuzadigan kun tartibi, yanada aniqroq aytsam kechki emak – ujinni juda kech belgilashi. Jamoa “ujin” uchun restoranga 22:00 dan barvaqt kirmasdi, 22-30; 23:00 va h., hatto bir marta tungi 01:00 da ham ovqatlanganmiz. SHifokor sifatida bu hol to'g'ri emasligi haqida bosh murabbiyga o'z fikrimni bir necha bor aytganman, biroq doimo shifokor maslahatiga quloq tutuvchi va mening ishimga umuman aralashmaydigan Kuper aynan shu masalada o'z fikridan qaytmadi (Bu “milliy odat” bosh murabbiyning qon-qongiga singib ketgan ekan-da). SHundan so'ng jamoa sardori Odil Ahmedovni yordamga chaqirdim. Odil bilan suhbatdan so'ng sardor hurmati yuzasidan kechki taomni o'sha kuni 21:30 da edik. Xursand bo'ldim, har qalay “mister” fikrini o'zgartirdi deb, ammo keyingi kun ertalab qarasam, kun tartibidagi ujin yana o'z joyiga – 22:30 ga qaytgandi...

 Ko'rsatuv allaqachon tugagan bo'lsa ham oynai jahonga tikilib “mister”ni, kun bo'yi uning murabbiylar shtabi bilan shovqin solib allanimalarni muhokama qilishdan charchamasligini esladim. Deyarli nonushta qilmaydigan sobiq bosh murabbiy hozirda “ujin”ga nima eyayotgan ekan-a?

@abrorpirmuhammad