Mo'minjon Abdullaev: "Ushbu g'alabamni Mustaqillik bayramimizga bag'ishlayman"

Biz ushbu muvaffaqiyatdan so'ng sportchining fikrlari bilan qiziqdik.

"Finalda jang qilgan qozog'istonlik raqibim juda kuchli sportchi edi. U ikki karra Osiyo o'yinlari g'olibi hisoblanadi, shuningdek, ikki karra jahon chempionatida ham sovrindorlar qatoridan o'rin olishga muvaffaq bo'lgan. Unga qarshi jiddiy tayyorgarlik bilan gilamga chiqdim. Mana, nasib qilgan ekan uni mag'lubiyatga uchrata oldim. Yarim finalda esa eronlik polvondan ustun keldim. U ham kuchli sportchi edi.

Ushbu muvaffaqiyatga erishganimdan judayam xursandman. Meni qo'llab-quvvatlagan barchaga, vatandoshlarimizga, ota-onam, oila azolarimga, barcha-barchaga rahmat aytmoqchiman.

Mustaqillik bayrami yaqinlashib kelmoqda. Qo'lga kiritgan oltin medalimni aynan ushbu bayramimizga bag'ishlayman. Barchaga rahmat", - dedi Mo'minjon Abdullaev.

Eslatib o'tamiz, Abdullaev yunon-rum kurashining -130 kg vazn toifasida musobaqada ishtirok etdi. U musobaqa davomida Janubiy Koreya, Tojikiston va Erondan tashrif buyurgan polvonlarni mag'lub etib, finalgacha etib bordi. Hal qiluvchi bahsda esa qozog'istonlik Nurmakan Tinalievdan 8:0 hisobida ustun keldi va shohsupaning eng yuqori pog'onasidan o'rin egalladi.