Muhammad Mokaevning yangi Ligadagi debyuti 3 daqiqadan sal ko'proq davom etdi

Mag'lubiyat nimaligini bilmay kelayotgan kelib chiqishi dog'istonlik, bir necha yildan beri Buyuk Britaniya sharafini himoya qilib kelayotgan Mokaev Brave promoushenida debyut qildi. 

U Brave Combat Federation (Brave CF) 91 turniri doirasida filippinlik Jovinseta Soga qarshi oktagonga chiqdi. Jang birinchi raundning to'rtinchi daqiqasi o'tib borayotgan bir paytda to'xtatildi. Tajribali Mokaev raqibini bo'g'ib qo'ydi. 

Aslida Muhammad Mokaev Janubiy Afrika Respublikasi vakili Lutando Biko bilan jang qilishi kerak edi. Ammo afrikalik aralash yakkakurash ustasi mashg'ulot chog'ida jarohat olgani bois, Muhammadga yangi raqib berilgandi.