Muhammadzohid Suyarov jahon chempioni, yana ikki shaxmatchimiz vice-chempion!

Ushbu musobaqada dunyoning 19 mamlakatidan 89 nafar shaxmatchi ishtirok etmoqda. Ular orasida o'g'il bolalarda 22, qizlarda esa 20 nafar xalqaro unvonga ega shaxmatchilar bor. O'zbekistondan 6 nafar shaxmatchi yurtimiz sharafini himoya qilmoqda.

Quvonarlisi, 20 yoshgacha bo'lgan yoshlar o'rtasida o'tkazilgan FIDE Rapid va Blic jahon chempionatining rapid yo'nalishida Muhammadzohid Suyarov 9 imkoniyatdan 7,5 ochko jamg'arib, oltin medal sohibi bo'ldi. Yana bir hamyurtimiz Muhiddin Madaminov 7 ochko bilan kumush medalga ega chiqdi. Belaruslik Denis Lazavi qo'shimcha ko'rsatkichlarga ko'ra 7 ochko bilan bronza medaliga sazovor bo'ldi. 

Qizlar o'rtasidagi rapid bahslarida O'zbekistonning birinchi raqamli shaxmatchisi Afruza Hamdamova 6,5 ochko to'plab, jahon chempionatining kumush medali bilan taqdirlandi. Qozog'istonlik Kseniya Balabaeva 7 ochko bilan jahon chempioni bo'ldi. FIDE bayrog'i ostida harakat qilgan rossiyalik Varvara Polyakova qo'shimchk ko'rsatkichlarga ko'ra 6,5 ochko bilan bronza medali sohibasi bo'ldi. To'qqiz imkoniyatdan 6 ochko to'plagan hamyurtimiz Umida Omonova 5-o'rindan joy oldi.