Muhiddin Madaminov "Al-Beruniy" xalqaro turniri "Masters" guruhi g'olibi + FOTO

Musobaqa uch guruhda o'tkazildi. "Masters" guruhida reytingi 2600 va undan yuqori bo'lgan 6 nafar xorijlik shaxmatchining ishtirok etgani musobaqa nufuzini oshirdi. Qolgan ikki guruhda ham dunyoning etakchi shaxmatchilari g'oliblik yo'lida bahs olib borishdi. 

Quvonarlisi, 18 yoshli grossmeysterimiz Muhiddin Madaminov "Masters" guruhi g'olibiga aylandi. U so'nggi 9-turda qora donalarda o'ynashiga qaramay, rossiyalik grossmeyster Sanan Syugirov bilan durang qayd etdi. Bu esa uning 6,5 ochko bilan chempion bo'lishi uchun kifoya qildi. Muhiddin bosh sovrin bilan birga 10 000 AQSH dollari miqdoridagi mukofot pulini ham qo'lga kiritdi. 

Madaminovga etib olishi mumkin bo'lgan armanistonliklar SHant Sargsyan va Xayk Martirosyan o'z partiyalarida durang o'ynashdi. Aynan shu ikki grossmeyster 6 ochko bilan kuchli uchlikka yakun yasashdi. "Masters" guruhida qatnashgan shaxmatchilarimiz Abdumalik Abdusalimov, Ortiq Nig'matov va Afruza Hamdamova so'nggi o'rinlarni band etishdi. Rapid bo'yicha amaldagi jahon chempioni Volodar Murzin 5,5 ochko bilan qo'shimcha ko'rsatkichlarga ko'ra 5-o'rin bilan kifoyalandi.

"CHellenjer" guruhi g'olibligi 9 imkoniyatdan 6 ochko jamg'argan Daneshvar Bardiyaga nasib etdi. Eronlik grossmeyster so'nggi turda Arseniy Nesterov bilan durang o'ynadi. Bardiyaning chempionligiga yosh shaxmatchimiz Muhammadzohid Suyarov ham yordam berib yubordi. U 5,5 ochkoga ega bo'lib turgan guruhning birinchi raqamli ishtirokchisi rossiyalik David Paravyanni mag'lubiyatga uchratdi. Nesterov qo'shimcha ko'rsatkichlarga ko'ra ikkinchi, Paravyan uchinchi o'rinni egalladi. Yosh shaxmatchimiz Humoyun Begmuratov 5 ochko bilan 4-o'rindan joy oldi. 

"Fyuchers" guruhida turkmanistonlik Saparmirat Atabaev 9 imkoniyatdan 7 ochko jamg'arib, qo'shimcha ko'rsatkichlarga ko'ra g'oliblikni qo'lga kiritdi. Hindistonlik Iniyan Pa ham 7 ochko jamg'ardi va u ikkinchi o'rinni egalladi. Sovrinli uchinchi o'rin 6,5 ochko jamg'argan belaruslik Mixail Nikitenkoga nasib etdi. Hamyurtlarimiz orasida eng yaxshi natijaga Asrorjon Omonov erishdi. U 4 ochko bilan 6-pog'onadan joy oldi.