Muhiddin Madaminov jahon chempioni, yana ikki shaxmatchimiz sovrindor!

27-28 sentyabr kunlari blic, yani tezkor shaxmat bo'yicha bahslar tashkil etildi. O'g'il bolalar o'rtasidagi musobaqada hamyurtimiz Muhiddin Madaminov 13 imkoniyatdan 12 ochko jamg'arib, jahon chempioniga aylandi. Birinchi raqam ostida tasniflangan FIDE bayrog'i ostida o'ynagan rossiyalik Denis Lazavik 11,5 ochko bilan kumush medal sohibiga aylandi.

Jahon chempionatining bronza medali yana bir hamyurtimiz Muhammadzohid Suyarovga nasib etdi. U 10 ochko bilan kuchli uchlikka yakun yasadi. Humoyun Begmuratov esa 9 ochko bilan 4-o'rindan joy oldi. Jahon chempionati sovrindori bo'lgan uchchala shaxmatchi ham so'nggi 13-turda qora donalarda o'ynaganliklariga qaramay, raqiblarini mag'lubiyatga uchratishdi.

Etiborlisi, Muhammadzohid Suyarov rapid bahslarida 9 imkoniyatdan 7,5 ochko to'plab, jahon chempioni bo'lgandi. Muhiddin Madaminov 7 ochko bilan kumush, shuncha ochkoga ega Denis Lazovik qo'shimcha ko'rsatkichlarga ko'ra bronza medaliga ega chiqqandi. 

Jahon chempionatining qizlar o'rtasidagi blic bahslarida Umida Omonova kumush medal bilan taqdirlandi. Hamyurtimiz 13 imkoniyatdan 9,5 ochko jamg'ardi. Niderlandiyalik Elin Robers 12 ochko bilan jahon chempioni bo'ldi. Rossiyalik Aleksandra Tarasenko 9 ochko to'plab, bronza medaliga sazovor bo'ldi.

Terma jamoamiz azolaridan Madinabonu Xalilova 6, Afruza Hamdamova 13-o'rin bilan kifoyalandi.