Muhriddin Tilovov Abu-Dabi "Katta Dubulg'a" medali uchun tatamiga chiqadi

Hozirgina dunyoning 4 qitasi 29 mamlakatidan jami 219 (150 erkak, 69 ayol) nafar dzyudochi ishtirok etayotgan mazkur musobaqada birinchi kungi saralash bahslari yakuniga etib, final dasturida medallar uchun tatamiga chiqadigan juftliklar malum bo'ldi. 

Mukofot jamg'armasi 154 000 evroni tashkil qiluvchi Abu-Dabi "Katta Dubulg'a" turnirida 16 nafar dzyudochimizning bahslarga kirishishi haqida xabar bergan edik. Ulardan 4 nafari bugun o'z ishtirokini boshladi va birgina Muhriddin Tilovov kechki dasturda bronza medali uchun tatamiga chiqish huquqini qo'lga kiritdi.  

-66 kg vaznda kurashayotgan tajribali dzyudochimiz Qozog'iston va franciyalik raqiblarini engib, 1/2 finalga etib kelgandi. Afsuski, final ostonasida u IJF bayrog'i ostida qatnashayotgan rossiyalik Murad CHopanovga ippon bahosi bilan yutqazib qo'ydi. Endi u bronza medali uchun yaponiyalik Takeshi Takeokaga qarshi tatamiga chiqadi.  

-60 kg vazndagi ikki dzyudochimiz Samariddin Qo'chqorov va Kamoliddin Baxtiyorov avvaliga 1/4 finalda, keyin esa bronza medali yo'lidagi o'tish bellashuvlarida raqiblariga imkoniyatni boy berib, musobaqadagi ishtiroklarini yakunlashdi.