Muvaffaqiyatga ilmiy yondashuv va ilg'or tajribalar orqali erishiladi

Jismoniy tarbiya va sport sohasida malakali kadrlarni tayyorlash, talim jarayonini xalqaro standartlarga moslashtirish va boshqaruv tizimini raqamlashtirish, pedagogik va ilmiy salohiyatni yanada oshirish hamda olib borilayotgan tadqiqot ishlari sifatini tubdan yaxshilash bo'yicha amalga oshirilayotgan ishlar sport sohasida qo'lga kiritilayotgan yutuqlarga omil bo'lmoqda.

Davlatimiz rahbarining “Jismoniy tarbiya va sport sohasida kadrlarni tayyorlash hamda ilmiy tadqiqotlar tizimini yanada takomillashtirish chora-tadbirlari to'g'risida”gi qarorida belgilangan vazifalarning ijrosi taminlanayotgani o'tgan yil Xitoyda o'tgan Osiyo o'yinlari, shuningdek joriy yil Franciya poytaxtida yakunlangan yozgi Olimpiya va Paralimpiya o'yinlaridagi natijalarda o'z aksini topdi. 

Mamlakatimizda mahoratli sportchilarni tayyorlash, ularni yuqori natijalarga erishishini taminlashda xalqaro tajribaning joriy etilishi, boshqaruv tizimida raqamlashtirishga o'tish sari tashlangan qadam ham o'ziga xos poydevor bo'ldi, deyish mumkin. 

Jismoniy tarbiya va sport ilmiy tadqiqotlar instituti tomonidan “Olimpiya va paralimpiya sport turlarini rivojlantirishning ilmiy-nazariy asoslari” mavzusida o'tkazilgan respublika ilmiy-amaliy anjumanida shu haqda so'z bordi. 

O'zbekiston davlat jismoniy tarbiya va sport universiteti rektori R.Matkarimov, O'zbekiston Sport vazirligi boshqarma boshlig'i o'rinbosari M.Arziqulov va boshqalar O'zbekiston sportida keyingi yillarda erishilayotgan yutuqlar, amalga oshirilayotgan keng ko'lamli islohotlar xususida to'xtaldi. 

Anjuman davomida sport sohasida yosh olim va etakchi mutaxassislarni, murabbiylarni tayyorlashning ahamiyati hamda bu yo'nalishda etibor berilishi lozim bo'lgan jihatlar qizg'in muhokama qilindi. 

Xorijiy mamlakatlarning ilg'or tajribalaridan kelib chiqib, kelgusi yil qita yoshlari o'rtasida mamlakatimizda o'tadigan “Toshkent-2025” Osiyo o'yinlari, qolaversa 2028 yilgi Olimpiada o'yinlariga sportchilarni tayyorlashda ilmiy-metodik yondashuv zarurligi, davlatimiz rahbarining “Parij-2024” ishtirokchilari bilan uchrashuvda soha mutasaddilari oldiga qo'ygan vazifalarga sidqidildan yondashilishi lozimligi bildirib o'tildi.