Nadiya Dusanova revansh oldi

Bahslarda nafaqat o'zbekistonlik, balki Tojikistondan tashrif buyurgan sportchilar ham ishtirok etishdi. Erkaklar o'rtasida 60 metrga to'siqlar osha yugurish bahslarida Ergash Normurodov 8.10 soniya natija bilan g'alaba qozondi va Sport ustasi meyorini bajardi.

Balandlikka sakrash bo'yicha ayollar o'rtasida g'oliblik uchun kurash Nadiya Dusanova va Safina Sadullaeva o'rtasida kechdi. Yodingizda bo'lsa, bir hafta oldin Ust-Kamenogorsk shahrida Olimpiada chempioni Olga Ripakova sovrini uchun o'tkazilgan turnirda Sadullaeva 192 sm natija bilan oltin medalga sazovor bo'lgandi. Bu safar esa Nadiya o'ziga xos revansh oldi va musobaqa g'olibi bo'ldi. Sportchilar 184 sm balandlikni zabt etishdi.

Ayollar o'rtasida 400 metrga yugurish bahslarida Tojikiston rekordchisi Kristina Pronjenko 57.39 soniya natija bilan g'olib bo'ldi. 200 metrga yugurish bellashuvlarida esa Komila Mirsolieva o'zining shaxsiy rekordini yangiladi (25.92 soniya) va g'alaba qozondi.

Erkaklar o'rtasida uzunlikka sakrash bo'yicha Javohir Noriev (7.15 m) g'olib bo'ldi. Uchxatlab sakrashda esa Islam Sibagatullin (15.36 m) ga teng keladigan raqib topilmadi.

Beshkurash yo'nalishida ilk marotaba ishtirok etgan Anna SHimanis 3208 ochko bilan birinchi o'rinni qo'lga kiritdi.

Ayollar o'rtasida 60 metrga to'siqlar osha yugurish bahslarida 8.65 soniya natija ko'rsatgan Valentina Kibalnikova barcha raqiblarini ortda qoldirdi.