Namanganda velotrek bo'yicha xalqaro turnir boshlandi

 2 aprelga qadar davom etadigan bahslarda hamyurtlarimizdan tashqari Buyuk Britaniya, Eron, Qozog'iston, Gonkong, Quvayt, Rossiya, Tojikiston, Turkmaniston kabi mamlakatlardan tashrif buyurgan 120 nafardan ziyod sportchi g'oliblik uchun bahs olib borishmoqda.

Musobaqaning birinchi kunida tantanali ochilish marosimi o'tkazildi. Unda Namangan viloyati hokimi SHavkat Abdurazzoqov, O'zbekiston velosiped sporti federaciyasi raisi o'rinbosari Kozim O'rinboyxo'jaev ishtirok etib, bu kabi turnirlarning tashkil etilishi Respublikamiz bo'ylab sog'lom turmush tarzi targ'ibotini kuchaytirishda katta yordam berishi haqida alohida to'xtalishdi.

Musobaqa erkaklar va yollar o'rtasida yakkalik hamda jamoaviy dasturlarda o'tkaziladi. Unda yurtimiz sharafini Dmitriy Bocharov, Danil Evdokimov, Aleksey Fomovskiy, Edem Eminovlardan iborat erkaklar hamda Sofiya Karimova, Margarita Misyurina, Madina Qahhorova, Nafosat Qo'zievalardan tashkil topgan ayollar jamoalari, shuningdek, yana asosiy jamoaga zaxira sifatida tayyorlab kelinayotgan ko'plab yosh sportchilar himoya qilishadi.

O'zbekiston velosiped sporti federaciyasining malum qilishicha, ushbu turnirda g'olib bo'lgan sportchilar Parij-2024 Olimpiya o'yinlariga reyting ochkolarini qo'lga kiritishi mumkin.