"Nasaf" o'z uyida 60ta o'yindan so'ng yana yirik hisobda mag'lub bo'ldi

Aytish mumkinki, bu "Nasaf" uchun umuman kutilmagan mag'lubiyat bo'ldi. Statistikaga murojaat qiladigan bo'lsak, "Nasaf" so'nggi bor 2014 yilning 15-turida o'z maydonida yirik hisobda mag'lub bo'lgan ekan. O'shanda Toshkentning boshqa bir klubi "Lokomotiv" Qarshida mezbonlar ustidan 5:2 hisobida zafar quchgandi.

SHundan so'ng "Nasaf" o'z maydonida beshta o'yin o'tkazib, to'rt bor g'alaba qozongan va bir marta durang qayd etgan. Jamoa 2015 yil o'z maydonida 15ta o'yin o'tkazib, ikkita o'yinda yutqazib qo'ygan: "Paxtakor" (0:1) va "Metallurg" (0:1). 2016 yil esa "ajdarlar" o'z uylarida bitta uchrashuvda mag'lub bo'lishgan: "Lokomotiv" (1:2). O'tgan yil ham jamoa faqat bitta uchrashuvda imkoniyatni boy berdi: "Bunyodkor" (0:1). Demak, 2:5 hisobidan keyin "Nasaf" oliy ligada 50ta o'yin o'tkazishga ulgurgandi.  

Bu mavsum hisobidan bugungi o'yin "Nasaf"ning o'z maydonidagi 11-bahsi bo'ldi. Bungacha o'tkazilgan 10ta bellashuvning uchtasida "Nasaf" yutqazib qo'ydi: "So'g'diyona" (1:2), "Paxtakor" (2:3) va AGMK (0:2). Bugungi o'yindan keyin uydagi mag'lubiyatlar soni to'rttaga etdi va shunday qilib Qarshidagi 60ta uchrashuvdan so'ng "Nasaf" yana yirik hisobda mag'lub bo'ldi.