Navoiyda “Save Aral” marafoni o'tkazildi

“O'zbekiston Respublikasida jismoniy tarbiya va sportni yanada takomillashtirish va ommalashtirish chora-tadbirlarni to'g'risida”gi Prezident farmoni ijrosini taminlash maqsadida respublikamiz bo'ylab sport tadbirlari va musobaqalar muntazam o'tkazib kelinmoqda. Jumladan, Navoiy viloyatida ham aholining barcha qatlamini jismoniy tarbiya va ommaviy sportga jalb qilish bo'yicha ko'plab ishlar olib borilmoqda. 

Jismoniy tarbiya va sport vazirligi, Milliy olimpiya qo'mitasi, O'zbekiston engil atletika va triatlon federaciyalari hamda Navoiy viloyati hokimligi hamkorligida o'tkazilgan “Yangi nafas” dasturi doirasidagi “Save Aral” marafoni ham shular jumlasidan. 

Marafon Navoiy shahridagi “O'zbekiston“ kinoteatri binosi yonidan start olib, ishtirokchilar uch kilometrlik masofani bosib o'tdilar. Ommaviy marafonda davlat va jamoat tashkilotlarining rahbarlari hamda xodimlari, aholining turli qatlamlari, 7 yoshdan 70 yoshgacha bo'lgan besh ming nafardan ortiq aholi ishtirok etdi.

Musobaqa yakunida g'oliblikni qo'lga kiritgan ishtirokchilar qimmatbaho sovg'alar bilan taqdirlanishdi. 

Malumot uchun: ushbu loyiha Prezident farmoni ijrosini taminlash maqsadida tashkil etilgan bo'lib, “Save Aral” marafoniga Andijonda start berilgan edi. Mamlakatimizning 19 shahrida o'tkaziladigan marafonga Qoraqalpog'iston Respublikasi Mo'ynoq shahrida yakun yasaladi.