Nodirbek Abdusattorov "Aimchess Rapid" turnirida hamon peshqadam!

Mukofot jamg'armasi 150 000 AQSH dollarini tashkil etuvchi ushbu nufuzli turnirda jahonning reytingi baland grossmeysterlari g'oliblik yo'lida dona suryapti. Yulduz shaxmatchilar qatorida hamyurtimiz Nodirbek Abdusattorov ham bahslarda muvaffaqiyatli ishtirok etyapti. 

Quvonarlisi, tezkor shaxmat bo'yicha jahonning eng yosh va shu bilan birga amaldagi chempioni hisoblangan Nodirbek ortda qolgan 8 tur natijalariga ko'ra dunyoning eng kuchli 16 nafar shaxmatchisi orasida turnir peshqadami bo'lib turibdi. Abdusattorov kechagi bahslarga qadar Mittal Aditya (Hindiston), Richard Rapport (Ruminiya), David Anton Guijarro (Ispaniya) ni mag'lub etib, hindistonlik Arjun Erigaisi bilan durang o'ynagandi. 

Kecha tunda o'tkazilgan partiyalarda ham Abdusattorov ancha ishonchli harakat qildi. Faqat 5-turda u hindistonlik Vidit Santoshga qora donalarda imkoniyatni boy berib qo'ydi. Oltinchi turda boshqa bir hind grossmeysteri Dommardju Gukesh taslim etildi. Nodirbek Gukeshni 44-Butunjahon shaxmat Olimpiadasining muhim bahsida ham mag'lubiyatga uchratgandi. Ettinchi partiyada hamyurtimiz qora donalarda o'ynashiga qaramay, hindistonlik taniqli grossmeyster Pentala Xarikrishnani engdi. Sakkizinchi turda yana qora donalarda harakat qilgan Nodirbek reytingda o'zidan yuqorida borayotgan niderlandiyalik Anish Giri bilan murosaga keldi. 

Nodirbek 5 ta g'alaba, 2 ta durang va 1 mag'lubiyatdan so'ng 24 imkoniyatdan 17 ochko jamg'arib, turnir jadvalida yakka peshqadamlikni davom ettirmoqda. Kuchli uchlikdan ozarbayjonlik SHaxriyar Mamedyarov va jahon tojdori Magnus Karlsen joy olgan. Ular hisobida 16 ochko bor. Bitta g'alaba uchun shaxmatchilarga 3, durangga 1 ochko beriladi.