Nodirbek Abdusattorov amaldagi jahon chempioni Gukeshni qora donalarda mag'lub etdi

Bugun dunyo birinchiligining ikkinchi kuni rapid bo'yicha yana 4 ta tur uchrashuvlari o'tkazildi. Nodirbek Abdusattorov 4 ta partiyadan 3 tasida g'alaba va 1 tasida durang natija qayd etdi. Bugunga belgilangan so'nggi 9-turda qora donalarda o'ynaganiga qaramay, amaldagi jahon chempioni hindistonlik Gukesh Dommaradjuni chiroyli tarzda mag'lubiyatga uchratdi. 

Bu bilan Nodirbek 9 imkoniyatdan 7 ochko jamg'arib, qo'shimcha ko'rsatkichlarga ko'ra 6-o'ringa ko'tarilib oldi. Abdusattorov kechagi kunni 3,5 ochko bilan 55-o'rinda yakunlagan edi. Bugun u 6-turda biroz kutilmaganda belgiyalik grossmeyster Daniel Darda bilan durang o'ynadi. Keyin esa ketma-ket amerikalik Endryu Xong, ispaniyalik Maksim CHigaev va amaldagi toj sohibi Gukesh Dommaradjuni taslim eta oldi.

Bugungi bellashuvlardan so'ng FIDE bayrog'i ostida o'ynayotgan va Magnus Karlsenga hozircha yagona mag'lubiyatni aynan bugun taqdim etgan rossiyalik Vladislav Artamev 7,5 ochko bilan peshqadamlik qilyapti. AQSH vakili Xans Niemann hisobida ham 7,5 ochko bor. Karlsen 7 ochko bilan kuchli uchlikka yakun yasagan. To'rtichi va beshinchi o'rindagi Aleksey Sarana hamda turkiyalik Yagiz Erdogmus hisobida ham 7 ochkodan bor. 

Ertaga rapid bahslari davom ettiriladi hamda g'olib va sovrindorlar nomi malum bo'ladi.