Nodirbek Abdusattorov ishtirok etgan turnirda saralash bosqichi yakunlandi

Mukofot jamg'armasi 150 ming AQSH dollarini tashkil etuvchi mazkur turnirda sayyoramizning eng kuchli grossmeysterlari ishtirok etyapti. Ular orasida hamyurtimiz, rapid yo'nalishi bo'yicha amaldagi va shu bilan birga eng yosh jahon chempioni Nodirbek Abdusattorov (2651) ham o'z imkoniyatini sinab ko'rdi. 

Kecha tunda dunyoning 16 nafar kuchli grossmeysterlari so'nggi 3 ta partiyada o'zaro dona surishdi va afsuski, Abdusattorov o'tkazilgan partiyalarda 1 durang va 2 mag'lubiyat qayd etdi. Bu esa yosh grossmeysterimizning yakunda kuchli sakkiztalikka kirib olishi uchun etarli bo'lmadi. 

Abdusattorov 13-turda polshalik Yan-Kshishtof Duda (2806) bilan murosaga keldi. Keyin esa nomdor raqiblari, amerikalik Levon Aronyan (2719) va ozarbayjonlik SHaxriyar Mamediyarov (2722)ga imkoniyatni boy berib qo'ydi. SHu tariqa, Nodirbek saralash bosqichini 19 ochko bilan 11-12 o'rinda yakunladi. 

Saralash bosqichini rossiyalik grossmeyster Yan Nepomnyashiy 29 ochko jamg'argan holda yakka peshqadam sifatida tugatdi. Amaldagi jahon toji sohibi Magnus Karlsen 25 ochko bilan ikkinchi o'rinni egalladi. Yigirma to'rttadan ochko jamg'argan Artemev va Esipenko uchinchi hamda to'rtinchi pog'onadan joy olishdi. 

Saralash yakuni. 1. Nepomnyashhiy - 29 ochko; 2. Karlsen - 25; 3-4.  Artemev, Esipenko - 24 ochkodan; 5. Xansen - 23; 6-8. Din Lijen, Le Kuang Lem, Kaymer - 22 ochkodan;

9-10. Aronyan, Giri - 21 ochkodan; 11-12. Pragnanandxa, Nodirbek Abdusattorov - 19 ochkodan; 13-14. Duda, Mamediyarov - 17; 15. Nimann - 15; 16. Kostenyuk - 3. 

Saralash bosqichi yakuniga ko'ra eng yaxshi natija qayd etgan 8 nafar shaxmatchi pley-off bosqichida g'oliblik uchun kurashni davom ettiradi. 

1/4 final juftliklari:

Yan Nepomnyashiy (Rossiya, 2773) - Vinsent Kaymer (Germaniya), 2664

Erik Xansen (Kanada, 2606) - Andrey Esipenko (Rossiya, 2714)

Vladislav Artemev (Rossiya, 2700) - Liren Ding (Xitoy, 2799)

Le Kuang Lem (Vetnam, 2709) - Magnus Karlsen (Norvegiya, 2865)