Nodirbek Abdusattorov Ruminiya turniri 6-turida Giri bilan o'ynadi + FOTO

O'z ichiga 5 ta turnirni jamlagan ushbu nufuzli shaxmat musobaqasining umumiy mukofot jamg'armasi 1,5 million AQSH dollarini tashkil etadi. Unda hamyurtimiz Nodirbek Abdusattorov (2766) ham o'z mahoratini namoyish etyapti. Kecha 6-turda u oq donalarda Anish Giri (Niderlandiya, 2745)ga qarshi bahs olib bordi va yana durangga imzo chekdi.   

Turnirning birinchi raqamli ishtirokchisi Fabiano Karuana (AQSH, 2805) ham oq donalarda FIDE bayrog'i ostida o'ynayotgan rossiyalik Yan Nepomnyashiy bilan murosaga keldi. Ushbu turda birgina franciyalik Alireza Firuzja g'alabaga erishdi. U amerikalik Uesli Sodan ustun keldi. Qolgan partiyalarda tomonlar durangga imzo chekishdi. 

6-turdan so'ng turnir jadvalida Karuana 4 ochko bilan yakka peshqadamlikni davom ettirmoqda. Firuzja, Praggnanandha va Gukesh hisobida 3,5 tadan ochko bor. Nodirbek Abdusattorov 2,5 ochko bilan qo'shimcha ko'rsatkichlarga ko'ra 8-o'rinni egallab turibdi. Uesli So va Anish Giri hisobida ham 2,5 ochkodan bor. Bugun Nodirbek 7-turda qora donalarda aynan Soga qarshi bahs olib boradi. 

Malumot uchun, "Superbet Chess Classic Romania" turnirining mukofot jamg'armasi 350 000 AQSH dollarini tashkil qiladi. CHempion grossmeyster 100 000 dollarni qo'lga kiritadi.