Nodirbek Abdusattorov Ruminiya turniri 7-turida o'ta murakkab vaziyatdan chiqib ketdi + FOTO

O'z ichiga 5 ta turnirni jamlagan ushbu nufuzli shaxmat musobaqasining umumiy mukofot jamg'armasi 1,5 million AQSH dollarini tashkil etadi. Unda hamyurtimiz Nodirbek Abdusattorov (2766) ham o'z mahoratini namoyish etyapti. 

Kecha 7-tur uchrashuvlari o'tkazildi va etiborlisi, barcha partiyalar durang natija bilan yakunlandi. Abdusattorov qora donalarda Uesli So (AQSH, 2757)ga qarshi bahs olib bordi va yana durangga imzo chekdi. Bu safar u juda qiyin vaziyatdan chiqib ketdi va durangga erisha oldi.  

Turnirning birinchi raqamli ishtirokchisi Fabiano Karuana (AQSH, 2805) 7-turning markaziy bahsida Dommaraju Gukesh (Hindiston, 2763) bilan murosaga keldi. 7-turdan so'ng turnir jadvalida hech qanday o'zgarish kuzatilmadi. Karuana 4,5 ochko bilan yakka peshqadamlikni davom ettirmoqda. Firuzja, Praggnanandha va Gukesh hisobida 4 tadan ochko bor. 

Nodirbek Abdusattorov 3 ochko bilan qo'shimcha ko'rsatkichlarga ko'ra 8-o'rinni egallab turibdi. Uesli So va Anish Giri hisobida ham 3 ochkodan bor. Bugun Nodirbek 8-turda oq donalarda musobaqa autsayderi Bogdan-Danel Dyak (Ruminiya, 2680)ga qarshi bahs olib boradi. 

Malumot uchun, "Superbet Chess Classic Romania" turnirining mukofot jamg'armasi 350 000 AQSH dollarini tashkil qiladi. CHempion grossmeyster 100 000 dollarni qo'lga kiritadi. 

Turnir ishtirokchilari: Fabiano Karuana (AQSH, 2805), Yan Nepomnyashhiy (FIDE, 2770), Nodirbek Abdusattorov (O'zbekiston, 2766), Dommaraju Gukesh (Hindiston, 2763), Uesli So (AQSH, 2757), Rameshbabu Pragnanandxa (Hindiston, 2747), Anish Giri (Niderlandiya, 2745), Alireza Firuzdja (Franciya, 2737), Maksim Vashe-Lagrav (Franciya, 2732), Bogdan-Danel Dyak (Ruminiya, 2680).