Nodirbek Abdusattorov Rustam Qosimjonovning tarixiy rekordini yangiladi

Niderlandiyaning Veyk-an-Zee shahrida shaxmat bo'yicha nufuzli "Tata Steel Chess-2023" turniri bo'lib o'tmoqda.

Kecha "Masters" guruhida ishtirok etayotgan hamyurtimiz Nodirbek Abdusattorov 5-tur doirasida norvegiyalik Magnus Karlsenni mag'lubiyatga uchratdi va guruhda 4 ochko bilan peshqadamga aylanib oldi.

SHundan so'ng, Abdusattorovning FIDE reytingidagi ochkolari soni 2731 taga etdi va Nodirbek bu borada O'zbekiston shaxmati tarixidagi eng yaxshi natijani qayd etdi. Bungacha eng yaxshi natija Rustam Qosimjonovga tegishli bo'lib turgan edi. Qosimjonov 2015 yilda reytingdagi ochkolari sonini 2715 taga etkazib, O'zbek shaxmatchilari orasidagi eng yaxshi natijani qayd etgan edi.

Abdusattorov bugun "Tata Steel Chess-2023" musobaqasining 6-turi doirasida ayni damda musobaqa jadvalining 3-pog'onasida borayotgan hindistonlik Pragnanandaga qarshi dona suradi. Hamyurtimiz ushbu bahsda oq donalarda harakat qiladi. Bahs Toshkent vaqti bilan 18:15 da boshlanadi.