Nodirbek Abdusattorov Saint Louis Rapid & Blitz turnirining ikkinchi kuni qanday natija qayd etdi?

Saint Louis Rapid & Blitz musobaqasi "Grand Chess Tour" loyihasi doirasidagi to'rtinchi turnir bo'lib, uning mukofot jamg'armasi 175 000 AQSH dollarini tashkil qiladi. Bosh sovrin uchun birinchi raqamli shaxmatchimiz Nodirbek Abdusattorov ham kurash olib boryapti. 

Turnir aylanma formatda, rapid va blic yo'nalishlarida vaqt nazoratida o'tkazilyapti. Grossmeysterlar 9 tur rapid, 18 tur blic yo'nalishida o'zaro dona surishadi. Musobaqaning dastlabki uch kuni rapid, qolgan ikki kuni blic bahslari tashkil etiladi. Rapid qismidagi g'alabaga 2, durangga 1 ochko beriladi. 

Turnir ishtirokchilari: Nodirbek Abdusattorov (O'zbekiston), Levon Aronyan, Fabiano Karuana, Hikaru Nakamura, Lener Dominges, Uesli So (hammasi AQSH), Maksim Vashe-Lagrav, Alirizo Firuzja (ikkisi Franciya), Yan Nepomnyashiy (FIDE), Rameshbabu Pragnanandha (Hindiston)

Musobaqaning ikkinchi kuni ham shaxmatchilar 3 ta turda to'qnash kelishdi. Nodirbek Abdusattorov kecha 2 durang va bir mag'lubiyat qayd etdi. Hamyurtimiz franciyalik Alirizo Firuzjaga imkoniyatni boy berdi. Hindistonlik Rameshbabu Pragnanandha hamda dunyoning uchinchi raqamli shaxmatchisi, amerikalik Fabiano Karuana bilan murosaga keldi. Nodirbek bugun o'tkaziladigan so'nggi rapid bahslari oldidan 5 ochko bilan qo'shimcha ko'rsatkichlarga ko'ra 6-o'rinni egallab turibdi.