Nodirbek Abdusattorov SHusha turnirining kechagi bahslarida ikki g'alaba qayd etdi + FOTO

SHu bilan birga musobaqaning rapid bahslariga ham yakun yasaldi. O'z tarixida 10-marotaba tashkil etilayotgan ushbu nufuzli turnirda jami 8 nafar grossmeyster, ular qatorida hamyurtimiz Nodirbek Abdusattorov ham ishtirok etyapti. Mamlakatimizning birinchi raqamli shaxmatchisi mazkur musobaqaning 2022 yilgi chempioni hisoblanadi. 

Nodirbek turnirning birinchi kuni o'tkazilgan 3 ta tur uchrashuvida 3 xil natija qayd etgandi. G'alaba bilan boshlab, o'rtada durang va yakunda mag'lubiyat bilan tugatgan edi. Kecha ham u uch xil natijaga erishdi. Abdusattorov qora donalarda Vladislav Artemev bilan murosaga keldi. Keyin oq donalarda ozarbayjonlik SHaxriyar Mamedyarovga yutqazib qo'ydi. 

Oltinchi turda yana oq donalarda o'ynaydi va bu safar Richchard Rapportni taslim etdi. Rapiddagi ishtirokini qora donalarda mezbonlar vakili Rauf Mamedovga qarshi uchrashuv bilan yakunladi. Bu bahsda yutqazib turishiga qaramay, yakunda chiroyli g'alabaga erishdi.

SHu tariqa, Vugar Gashimov turnirida rapid bahslari yakuniga etdi. Yan Nepomnyashiy 14 imkoniyatdan 10 ochko jamg'arib, blic bahslari oldidan turnir jadvalida yakka peshqadamlik qilyapti. SHaxriyar Mamedyarov 9 ochko bilan ikkinchi o'rinni band etgan bo'lsa, Artemev va Abdusattorov 8 ochko bilan keyingi pog'onalardan joy olishgan. Hamyurtimiz qo'shimcha ko'rsatkichlarga ko'ra 4-o'rinni egallab turibdi. 

Bugundan blic yo'nalishidagi bahslarga start beriladi. Nodirbek Abdusattorov blicning ilk turida hindistonlik grossmeyster Aravind CHitambaramga qarshi oq donalarda harakat qiladi. Vugar Gashimov xalqaro xotira turnirining amaldagi chempioni hindistonlik Vidit Santosh musobaqaga kela olmadi. Uning o'rnini aynan CHitambaram egallagan. 

Malumot uchun, norvegiyalik Magnus Karlsen turnirning 4 karra g'olibi hisoblanadi. SHaxriyar Mamedyarov ikki bor chempionlikka erishgan bo'lsa, Fabiano Karuana (AQSH), Nodirbek Abdusattorov (O'zbekiston) va Vidit Santosh (Hindiston) bir marotabadan bosh sovringa ega chiqqan.