Nodirbek Abdusattorov Sinquefield Cup 2025 turniridagi yurishini boshladi

Grand Chess Tour’ning yakuniy klassik bosqichi 29 avgustga qadar davom etadi va aylanma tizimda 9 turdan iborat bo'ladi. Ushbu bosqich GCT ochkolari uchun so'nggi imkoniyat hisoblanadi. Kechadan dunyoning ko'zga ko'ringan va reytingi yuqori bo'lgan 10 nafar grossmeysteri bosh sovrin uchun bahslarga kirishdi. 

Nodirbek Abdusattorov to'rt soatdan oshiq davom etgan 1-tur uchrashuvida Levon Aronyanga imkoniyatni boy berib qo'ydi. Oq donalarda harakat qilgan hamyurtimiz vaqt kamligi sabab endshpilga tushib qoldi va buning natijasida xatoga yo'l qo'ydi. Amerikalik grossmeyster bir necha kun oldin aynan Sent-Luis shahrida yakuniga etgan Saint Louis Rapid and Blitz 2025 turnirida chempion bo'lgan edi. O'shanda Nodirbek har ikki blic partiyalarida Aronyanni mag'lubiyatga uchratgandi. Levon kecha o'sha mag'lubiyatlar uchun revansh ola bildi.    

Birinchi turda Rameshbabu Praggnanandha ham muhim g'alabaga erishdi. U o'ziga xos hind derbisida vatandoshi, amaldagi jahon chempioni Gukesh Dommaradjuni oq donalarda mag'lubiyatga uchratdi. Birinchi turning qolgan uchta partiyasida tomonlar murosaga kelishdi.  

Bugun 2-tur uchrashuvlari o'tkaziladi. Bizning vaqt bilan soat 22:00da boshlanadigan turda Nodirbek Abdusattorov amaldagi jahon chempioni Gukesh Dommaradjuga qarshi qora donalarda o'ynaydi.  

Sinquefield Cup 2025. 1-tur natijalari:

Sem Sevian (AQSH) - Uesli So (AQSH) - 1/2-1/2

Maksim Vashe-Lagrav (Franciya) - Alireza Firuzdja (Franciya) - 1/2-1/2

Nodirbek Abdusattorov (O'zbekiston) - Levon Aronyan (AQSH) - 0-1

Rameshbabu Praggnanadha (Hindiston) - Gukesh Dommaradju (Hindiston) - 1-0

Fabiano Karuana (AQSH) - Yan-Krishtof Duda (Polsha) - 1/2-1/2

Sinquefield Cup 2025. 2-tur juftliklari:

Rameshbabu Praggnanadha (Hindiston) - Fabiano Karuana (AQSH)      

Levon Aronyan (AQSH) - Sem Sevian (AQSH) 

Uesli So (AQSH) - Maksim Vashe-Lagrav (Franciya)

Alireza Firuzdja (Franciya) - Yan-Krishtof Duda (Polsha)

Gukesh Dommaradju (Hindiston) - Nodirbek Abdusattorov (O'zbekiston)