Nodirbek Abdusattorov so'nggi turda chiroyli g'alabaga erishdi va Sinquefield Cup`ni kuchli uchlikda yakunladi

Grand Chess Tour musobaqasining beshinchi bosqichi hisoblangan ushbu turnirning mukofot jamg'armasi 350 000 AQSH dollarini tashkil etdi. Musobaqada dunyoning 10 nafar kuchli grossmeysteri bosh sovrin uchun bahs olib bordi. Ular orasida jahon chempioni Nodirbek Abdusattorov (2762) ham bor edi. 

Turnirning so'nggi 9-turida hamyurtimiz oq donalarda musobaqaning ikkinchi raqamli shaxmatchisi, FIDE bayrog'i ostida qatnashgan rossiyalik Yan Nepomnyashiyga qarshi bahs olib bordi va chiroyli g'alabaga erishdi. 

SHu tariqa, Nodirbek 2 g'alaba, 6 durang va 1 mag'lubiyat bilan turnir jadvalida qo'shimcha ko'rsatkichlarga ko'ra 3-o'rinni egalladi. To'rtinchi pog'onadagi Maksim Vashe-Lagrav (Franciya, 2721) ham musobaqani 5 ochko bilan yakunladi. Francuz grossmeysteri so'nggi turda amaldagi jahon chempioni Din Lijen (Xitoy, 2745)ni mag'lubiyatga uchratdi. 

To'qqizinchi turning yana bir uchrashuvida g'alaba qayd etildi. Turnirning birinchi raqamli ishtirokchisi Fabiano Karuana oq donalarda Anish Giri (Niderlandiya, 2746)ni engdi. Bu bilan amerikalik shaxmatchi ochkolarini 5,5 taga etkazib, musobaqani 2-o'rinda yakunladi. 

Sinquefield Cup bosh sovrini Alireza Firuzja (Franciya, 2751)ga nasib etdi. Farang grossmeysteri so'nggi 9-turda oq donalarda Rameshbabu Pragnanandxa (Hindiston, 2749) bilan murosaga keldi. Bu durang unga 6 ochko bilan turnir chempioni bo'lish uchun kifoya qildi.  

Turnir ishtirokchilari: Fabiano Karuana (AQSH, 2793), Yan Nepomnyashhiy (FIDE, 2767), Dommaradju Gukesh (Hindiston, 2766), Nodirbek Abdusattorov (O'zbekiston, 2762), Uesli So (AQSH, 2751), Alireza Firuzja (Franciya, 2751), Rameshbabu Pragnanandxa (Hindiston, 2749), Anish Giri (Niderlandiya, 2746), Din Lijen (Xitoy, 2745), Maksim Vashe-Lagrav (Franciya, 2721).