Nodirbek Abdusattorov "Tata Steel Chess India" turniri peshqadami bo'lib oldi

O'z tarixida oltinchi bor o'tkazilayotgan nufuzli musobaqaning mukofot jamg'armasi 41 500 AQSH dollarini tashkil etadi. Turnir 9 tur rapid (25+10) va 18 tur blic (3+2) yo'nalishida o'tkazilib, unda birinchi raqamli shaxmatchimiz Nodirbek Abdusattorov ham bosh sovrin uchun bahs olib bormoqda. 

Rapid va blic yo'nalishlari uchun alohida g'olib aniqlanadigan "Tata Steel Chess India" turnirida Magnus Karlsen ham ishtirok etyapti. Quvonarlisi, Nodirbek birinchi kungi bahslardan so'ng turnir jadvalida yakka peshqadam bo'lib oldi. U kecha o'tkazilgan 3 ta partiyaning 2 tasida g'alaba va birida durang natija qayd etdi. 

Nodirbek avvaliga FIDE bayrog'i ostida harakat qilayotgan rossiyalik Danil Dubov bilan murosaga keldi. Keyin esa germaniyalik Vinsent Keymer hamda hindistonlik Rameshbabu Pragnanandhani mag'lubiyatga uchratdi. Uch imkoniyatdan ikki yarim ochko jamg'argan Abdusattorov bugungi bahslar oldidan turnir jadvalida yakka karvonboshi bo'lib turibdi.