Nodirbek Abdusattorov va boshqalar Sharjah Masters 2025`dan qancha mukofot puli ishlab olishdi?

Mukofot jamg'armasi 73 000 AQSH dollarini tashkil etgan ushbu musobaqaning kuchlilar jam bo'lgan "Masters" guruhida grossmeysterimiz Nodirbek Abdusattorov 9 imkoniyatdan 6,5 ochko to'plab, 3-o'rinni egalladi. Hamyurtimiz 10 kunlik mehnatidan 7000 AQSH dollari ishlab oldi. 

Nodirbekdan yarim ochko ko'p to'plab, Sharjah Masters 2025 turniri chempioniga aylangan niderlandiyalik Anish Giri 15 000 dollar qo'lga kiritdi. Abdusattorov singari 6,5 ochko jamg'arib, ikkinchi o'rinni egallagan serbiyalik Aleksandr Indjich 10 000 dollarga boyib oldi. 

Sharjah Masters 2025 turnirining 9-turida Jahongir Vohidov oq donalarda polshalik Malek Jandan ustun keldi. Muhiddin Madaminov qora donalarda turkiyalik Ishik Alparslan bilan durang o'ynadi. Ortiq Nig'matov esa oq donalarda yana bir turk shaxmatchisi Sanal Vahab bilan murosaga keldi. Top-15`talikka kirgan shaxmatchilar ham pul mukofotlariga ega bo'lishdi. 

Etiborlisi, Sharjah Masters 2025 turnirining S guruhida ishtirok etgan Qilichbek Nazaraliev 9 imkoniyatdan 7,5 ochko to'plab, 2-o'rinni egalladi. O'z guruhida 35-raqam ostida saralanganiga qaramay, hamyurtimiz reytingda o'zidan yuqorida borayotgan raqiblarini ortda qoldirishga muvaffaq bo'ldi. Nazaraliev 1100 dollar mukofot puliga ham ega chiqdi.