Nodirbek Abdusattorov va yana uch grossmeysterimiz Sharjah Masters turnirida ishtirok etadi

Kecha Ruminiyaning Buxarest shahrida yakuniga etgan turnirning so'nggi turida o'ynagan Nodirbek Abdusattorov bugun deyarli dam olishsiz boshqa davlatdagi musobaqaning birinchi tur uchrashuvida dona suradi. Abdusattorov Sharjah Masters turnirida birinchi raqam ostida tasniflangan. U bugun soat 17:00da boshlanadigan 1-tur uchrashuvida qora donalarda hindistonlik grossmeyster Panayappan Setxuramanga qarshi bahs olib boradi.

Mukofot jamg'armasi 73 000 AQSH dollarini tashkil etuvchi ushbu musobaqada Nodirbek Abdusattorovdan tashqari yana uch grossmeysterimiz - Jahongir Vohidov, Muhiddin Madaminov va Ortiq Nig'matov ham sovrinli o'rinlar uchun bahslarga kirishadi. 

Sharjah Masters 2025 turniri shveycarcha tizimda o'tkazilib, 9 turdan iborat bo'ladi. Vaqt nazorati 90 daqiqa va har bir yurishga qo'shimcha 30 soniya vaqt qo'shib beriladi. Niderlandiyalik Anish Giri musobaqada Nodirbekdan keyin ikkinchi raqam ostida saralangan. 

SHaxmatchilarimizning bugungi 1-tur uchrashuvlari:

Panayappan Setxuraman (Hindiston) - Nodirbek Abdusattorov

Jahongir Vohidov - Amin Tabatabayi (Eron)

Muhiddin Madaminov - Syanyuy Syuy (Xitoy)

Ortiq Nig'matov - Pranav Anand (Hindiston)