Nodirbek Abdusattorov yana 4 partiyada nomdor raqiblariga qarshi dona surdi

Mukofot jamg'armasi 150 ming AQSH dollarini tashkil etuvchi mazkur turnirda sayyoramizning eng kuchli grossmeysterlari ishtirok etyapti. Ular orasida hamyurtimiz, rapid yo'nalishi bo'yicha amaldagi va shu bilan birga eng yosh jahon chempioni Nodirbek Abdusattorov (2651) ham bor.

Birinchi kun o'tkazilgan 4 ta partiyada Abdusattorov hech bir raqibiga yutqazmagandi. Yana bir muhim jihat, amaldagi jahon tojdori Magnus Karlsen (2865) bu safar ham yosh grossmeysterimizni mag'lub eta olmagan edi. Karlsenga qarshi qora donalarda harakat qilgan Nodirbek durang natija qayd etgandi. Aynan Magnus ushbu musobaqaning amaldagi g'olibi hisoblanadi. 

Kecha Abdusattorov musobaqa doirasida yana 4 ta partiya o'tkazdi. Yosh grossmeysterimiz 5-turda jahon tojiga so'nggi davogar, rossiyalik Yan Nepomnyashiy (2773) bilan qora donalarda o'ynadi va imkoniyatni boy berdi. Oltinchi turda ayollar o'rtasida 12-Jahon chempioni, rossiyalik Aleksandra Kostenyuk (2516)ni mag'lubiyatga uchratdi. Ettinchi partiyada qora donalarda o'ynadi va germaniyalik xalqaro grossmeyster Vinsent Keymer (2664)ga yutqazib qo'ydi. Sakkizinchi turda AQSH vakili Xans Niemenn (2642)dan ustun keldi. 

SHu tariqa, Nodirbek Abdusattorov ikkinchi kungi bahslarda 2 g'alaba va 2 mag'lubiyat qayd etdi. Bugun hamyurtimiz 9-turda hindistonlik Pragnanandxa (2612), 10-turda vetnamlik Liem Kuang Le (2709), 11-turda kanadalik Erik Xansen (2606), 12-turda esa xitoylik Liren Ding (2799) bilan hisob-kitob qiladi.       

Malumot uchun, 16 xalqaro grossmeyster ishtirokidagi musobaqa rapid yo'nalishida o'tkazayotgan bo'lib, dastlab ishtirokchilar 15 turdan iborat saralash bosqichida o'zaro kuch sinashadi. SHaxmatchilar to'plagan har bir ochkosi uchun 250 dollardan mukofot olishadi. Saralash bosqichi yakuniga ko'ra eng yaxshi natija qayd etgan 8 nafar shaxmatchi pley-off bosqichida g'oliblik uchun kurash olib boradi. Bu bosqichda har bir o'yin muhim ahamiyatga ega va yutqazgan shaxmatchi uchun musobaqa tugaydi.

Eslatib o'tamiz, yaqinda Polshada o'tkazilgan jahon chempionatida Nodirbek Abdusattorov Magnus Karlsenni shov-shuvli tarzda mag'lubiyatga uchratgan edi.