Nodirbek Abdusattorov yana Magnus Karlsenga qarshi dona suradi

Mukofot jamg'armasi 150 ming AQSH dollarini tashkil etuvchi mazkur turnir o'z atrofiga dunyoning eng kuchli shaxmat ustalarini jamlagani bilan ahamiyatli. Ular orasida hamyurtimiz, rapid yo'nalishi bo'yicha eng yosh jahon chempioni Nodirbek Abdusattorov ham bor.

Musobaqa rapid yo'nalishida o'tkazilib, dastlab ishtirokchilar 15 turdan iborat saralash bosqichida o'zaro kuch sinashadi. SHaxmatchilar to'plagan har bir ochkosi uchun 250 dollardan mukofot olishadi. Saralash bosqichi yakuniga ko'ra eng yaxshi natija qayd etgan 8 nafar shaxmatchi esa pley-off bosqichida g'oliblik uchun kurash olib boradi. Bu bosqichda har bir o'yin muhim ahamiyatga ega va yutqazgan shaxmatchi uchun musobaqa tugaydi.

Qura natijasiga ko'ra saralash bahslarida Nodirbek Abdusattorov kimlarga qarshi dona surishi ham malum bo'ldi. Unga ko'ra, 1-turda hamyurtimiz niderlandiyalik mashhur shaxmat ustasi Anish Giri bilan kuch sinashsa, ikkinchi raundda jahon tojdori, ushbu musobaqaning amaldagi g'olibi Magnus Karlsenga qarshi dona suradi.

Mazkur o'yinga qiziqish nihoyatda yuqori bo'lishi tabiiy, zero Karlsen yaqinda Polshada o'tkazilgan jahon chempionatidagi mag'lubiyat uchun revansh olishga harakat qilsa, Nodirbek o'sha g'alaba tasodif emasligini isbotlashga urinadi.

SHuningdek, saralash bosqichida Abdusattorovga qarshi dunyo tan olgan shaxmat ustalari – Yan Nepomnyashiy (Rossiya), ayollar o'rtasida 12-jahon chempioni Aleksandra Kostenyuk (Rossiya), dunyo reytingi peshqadamlaridan Din Lijen (Xitoy), qolaversa Yan Kshishtof Duda (Polsha), Levon Aronyan (Armaniston), SHaxriyor Mamadiyorov (Ozarbayjon) va boshqalar dona surishadi.

Biz Nodirbekka ushbu musobaqada omad va zafarlar yor bo'lishini tilaymiz.