Nodirbek Yakubboev Polshadagi nufuzli turnirda peshqadamlik qilmoqda

O'z tarixida 61-marotaba tashkil etilayotgan ushbu musobaqa 7 ta guruhda o'tkazilayotgan bo'lib, kuchlilar jam bo'lgan “ALREH” guruhida hamyurtimiz, xalqaro grossmeyster Nodirbek Yakubboev ham bosh sovrin uchun kurash olib bormoqda. Ushbu guruhdan 10 nafar grossmeyster o'rin olgan bo'lib, g'olib 9 tur natijasiga ko'ra aniqlanadi. 

“ALREH” guruhi ishtirokchilari: Aravindh CHithambaram (Hindiston) – 2723, Igor Kovalenko (Ukraina) – 2676, Maykl Adams (Angliya) – 2663, Nodirbek Yakubboev (O'zbekiston) – 2663, Mattias Bluebaum (Germaniya) – 2660, David Navara (CHexiya) – 2650, Radoslav Voytashek (Polsha) – 2648, Mateush Bartel (Polsha) – 2576, Pavel Teclaf (Polsha) – 2571, Yan Klimkovski (Polsha) – 2517

Quvonarlisi, 5-turdan so'ng Nodirbek Yakubboev 3,5 ochko bilan qo'shimcha ko'rsatkichlarga ko'ra peshqadamligini saqlab qoldi. Yakubboev 5-turda chexiyalik taniqli grossmeyster David Navaraga qarshi qora donalarda o'ynab, durangga imzo chekdi. Bu turda qora donalarda harakat qilganiga qaramay, angliyalik Maykl Adamsni mag'lubiyatga uchratgan germaniyalik Mattis Bluebaum ochkolarini 3,5 taga etkazib, uchinchi o'ringa ko'tarilib oldi. Ikkinchi pog'onadagi Radoslav Voytashek hisobida ham 3,5 ochko bor. Bugun 6-turda Nodirbek oq donalarda mezbon shaxmatchi Pavel Teclavga qarshi bahs olib boradi.