Nodirbek Yakubboevda yana g'alaba, u 61th Rubinstein Memorial chempionligiga yaqin!

O'z tarixida 61-marotaba tashkil etilayotgan ushbu musobaqa 7 ta guruhda o'tkazilayotgan bo'lib, kuchlilar jam bo'lgan “ALREH” guruhida hamyurtimiz, xalqaro grossmeyster Nodirbek Yakubboev ham bosh sovrin uchun kurash olib bormoqda. Ushbu guruhdan 10 nafar grossmeyster o'rin olgan bo'lib, g'olib 9 tur natijasiga ko'ra aniqlanadi. 

“ALREH” guruhi ishtirokchilari: Aravindh CHithambaram (Hindiston) – 2723, Igor Kovalenko (Ukraina) – 2676, Maykl Adams (Angliya) – 2663, Nodirbek Yakubboev (O'zbekiston) – 2663, Mattias Bluebaum (Germaniya) – 2660, David Navara (CHexiya) – 2650, Radoslav Voytashek (Polsha) – 2648, Mateush Bartel (Polsha) – 2576, Pavel Teclaf (Polsha) – 2571, Yan Klimkovski (Polsha) – 2517

Quvonarlisi, 7-turda Nodirbek Yakubboev yana bir muhim g'alabani qo'lga kiritdi. Grossmeysterimiz o'yin startida o'z farzinini ruh va filga almashtirib yuborganiga qaramay, yakunda nafaqat durang, balki g'alabani ham yulib oldi. Yakubboev angliyalik tajribali grossmeyster Maykl Adamsni mag'lubiyatga uchratdi. Farzinsiz farzinli raqibni yutish juda kam holatda uchraydi. Bu bilan Nodirbek o'z ochkolarini 5,5 taga etkazib, yakka peshqadamligini davom ettirmoqda. 

Bugun hamyurtimiz 8-turda eng yaqin taqibchisi, 4,5 ochko bilan qo'shimcha ko'rsatkichlarga ko'ra 2-o'rinni egallab turgan germaniyalik grossmeyster Mattias Blubaumga qarshi bahs olib boradi. Uchrashuv bizning vaqt bilan soat 18:15'da boshlanadi. Agar Nodirbek bugun g'alaba qozona olsa, muddatidan oldin Polsha turniri chempioni bo'lishi mumkin.