Octagon 68. CHempion Anvar Abdullaevning tajribali raqibga qarshi jangi to'liq davom etdi

Turnirning markaziy jangi o'ta engil vazn toifasida Liga chempioni bo'lib turgan o'zbekistonlik aralash yakka kurash ustasi Anvar Abdullaev (9-0) hamda Interim (vaqtinchalik chempionlik kamari) sohibi, Ozarbayjon vakili Farid Alibabazade (13-8-1) o'rtasida kechdi.

5 raundlik chempionlik jangi to'liq davom etdi va unda Abdullaev hakamlarning yakdil qarori bilan g'alabani o'ziniki qildi.

Bu Surxondaryoda tug'ilgan Abdullaev uchun ikkinchi himoya jangi edi. U 2023 yilning dekabr oyida o'tkazilgan Octagon 53 turniri doirasida boshqa bir ozarbayjonlik sportchi — Royal Leylizadeni mag'lub etib, ilk bor kamarini himoya qilgandi. Takidlash joiz, Anvar har ikki himoya jangini ozarbayjonlik sportchilarga qarshi o'tkazib, g'alabaga erishdi.

Yodingizda bo'lsa, 30 yoshli Farid Alibabazade 2023 yilda MPL 10 turniri doirasida keyinchalik UFC'ga o'tgan o'zbekistonlik Ramazon Temirov bilan yuzma-yuz kelgandi, ular keyinchalik kamar uchun jang qilishi aytilgandi, biroq bu hozircha amalga oshmadi.